सातवाहन काळात कोल्हापूर परिसरात बौद्ध धर्माचा प्रसार झाला होता हे कोल्हापूर, पन्हाळा, जोतिबा, गगनबावडा या ठिकाणी सापडलेल्या बौद्ध भिख्खूंच्या गुहांवरून सिद्ध होते. प्रा. के. जी. कुन्दनगार म्हणतात, "सातवाहन काळात नाशिक पासून कोल्हापूरपर्यंत पश्चिम घाटात अनेक बौद्ध भिख्खूंच्या गुहा (Caves) सापडतात. याचा काळ इ. स. पहिले शतक असा असावा. जोतिबा डोंगराजवळील पोहाळे गुंफा, पन्हाळा जवळील पांडव दऱ्यातील गुंफा आणि गगनबावड्यातील गुंफा सातवाहन कालीन आहेत." दोन हजार वर्षांपूर्वी कोल्हापूर हे नामांकित बौद्ध केंद्र होते याचा पुरावा १८७७ साली झालेल्या उत्खननातील स्तुपाच्या रूपाने पुढे आला आहेच. थोडक्यात, सातवाहनांचा कालखंड हा कोल्हापूरच्या प्राचीन इतिहासातील एक महत्त्वाचे गौरवशाली पर्व होऊन गेले. या काळात कोल्हापूरचा ग्रीक-रोम या पाश्चात्त्य देशातील संस्कृतीशी संबंध आला; तसेच व्यापारी संबंध होऊन कोल्हापूरचा व्यापार भरभराटीस आला.