Clear Male Narrator
saurabh rajput에 의해Mehnat mazdoor ki, sahyog sarkar ka, sadak seth ki. Jee haan, Omprakash Valmiki ki kavita 'Thakur ka Kuan' ko badalkar padha jaana chahiye. Public school seth ke, sainik school bhi seth ke, company seth ki, khet, khalihaan, khadaan, jangal seth ke, gali-moholle seth ke, to phir apna kya? Gaaon, shehar, desh?
Yeh kavita Ganga Expressway ko lekar yaad aayi. Kyun? Kyunki Meerut se Prayagraj yaani Allahabad tak ke 594 kilometer lambe is expressway ka udghatan abhi hamare param aadarneeya Pradhanmantri Narendra Modi ji ne kiya 29 April ko. Ise UP ke vikas mein meel ka patthar kaha ja raha hai. Is par speed jo maximum rakhi gayi hai, 120 kilometer prati ghanta ki rakhi gayi hai raftaar. Aur kaha ja raha hai ki Meerut se Prayagraj jaane mein ismein 5 se 6 ghante ki bachat hogi.
Is expressway ko PPP model yaani Public Private Partnership ke tahat banaya gaya hai aur ismein sarkar ki agency hai Uttar Pradesh Expressways Audyogik Vikas Pradhikaran, aur private partner kaun hain? Hamare jagat seth Adani ji, yaani Adani Enterprises. Jinka is project mein 80 feesdi tak ka hissa bataya ja raha hai. Yaani isse milne wala toll bhi kam se kam agle 27 ya 30 saal tak unke hi khaate mein jayega. Toll bhi aisa-waisa nahi hai, hazaron mein hai.
Ganga Expressway par toll ki dar dopahiya, tipahiya aur tractor ke liye ₹1.28 prati kilometer rakhi gayi hai. Car, jeep, van ke liye ₹2.55, halke commercial vaahan, mini bus ke liye ₹4.05 aur bus, truck ke liye lagbhag ₹8.20 prati kilometer ki dar rakhi gayi hai. Is tarah agar aap bike se Meerut se Prayagraj jayein, to aapka ek taraf ka toll padega ₹760 aur car se jaane par ₹1515.
Chunki yeh express 12 jilon ko jodta hai aur agar aap apni yatra break karke jayein, yaani ek jagah utar jayein aur phir is expressway par chadhein, yaani Meerut se Budaun, Budaun se Hardoi, to bike se aapke ₹900 ka toll padega aur car se ₹1800 tak ka toll. Yaani aane-jaane mein bike se ₹1800 aur car se ₹3600 toll dena hoga.
Yahi nahi, bus ka bhi kiraya badhega aur wo kisse vasula jayega? Aam yaatriyon se. Log comment kar rahe hain, 'Isse accha to train ya flight se chale jayein, wahi sasti padegi.' Aap mein se bahut log kahenge ki vikas ki keemat to chukani hi hogi. Lekin asal sawal isi vikas ke model par hai, jismein vikas ka matlab kuch flyover, expressway aur oonchi imaartein maan liya gaya hai. Ismein na mehangai ki baat hoti hai, na rozgar ki baat hoti hai, na prati vyakti aay ki baat hoti hai, na jeevan star ki baat hoti hai.
Khair, itne zyada toll par Godi Media koi baat nahi kar raha hai. Pehle uski headline Modi ji ke aitihasik udghatan ki thi aur ab hai ki Yogi ji ne 15 din ke liye is expressway ko toll-free kar diya hai. Yaani janta ki taraf se toll paisa wo sarkar seth ji ko degi. Khair, kya keh sakte hain. Modi hain, Yogi hain aur unke param mitr seth ji hain, to phir sab kuch mumkin hai.
